අම්බලන්ගොඩ, ශ්රී ලංකාව — සාමය, කරුණාව සහ ඉන්දීය-ශ්රී ලංකා-ටිබෙට් සබැඳියාව පෙරදැරි කරගත් ඓතිහාසික සංස්කෘතික උළෙලක් ලෙස, ටිබෙට් අධ්යාත්මික නායක සහ නොබෙල් සාම ත්යාගලාභී අතිපූජ්ය දලයි ලාමා හිමිගේ ස්වයංචරිත අපදානය වන “Freedom in Exile” කෘතියේ සිංහල පරිවර්තනය වන “පිටුවහල්වී නිදහස” ග්රන්ථය පසුගිය සිකුරාදා අම්බලන්ගොඩ ධර්මාශෝක විද්යාලයේ මුදලිදු තෝමස් ද සිල්වා අනුස්මරණ ප්රධාන ශාලාවේදී එළිදක්වන ලදී.
මොරටුව විශ්වවිද්යාලයේ හිටපු උපකුලපති, විද්යාලයේ විශිෂ්ට ආදි සිසුවෙකු වන මහාචාර්ය ජී.ටී. ප්රැන්සිස් ද සිල්වා මහතාගේ විශිෂ්ට සාහිත්ය මෙහෙවර ඇගයීම පිණිස සංවිධානය කරන ලද මෙම උත්සවය සඳහා ආචාර්ය මණ්ඩලය, සිසුන්, දෙමාපියන් සහ ආදි සිසුන් ඇතුළු 500කට අධික පිරිසක් එක්ව සිටියහ.
මෙම උළෙල සඳහා ශ්රී ලංකාවේ ඉන්දියානු කොන්සල් ජෙනරාල් ශ්රී හර්වින්දර් සිං මහතා ප්රධාන ආරාධිතයා ලෙස සහභාගී වූ අතර, ශ්රී ලංකා ටිබෙට් බෞද්ධ සංගමයේ නිර්මාතෘ සභාපති සහ ජාත්යන්තර බෞද්ධ කොන්ග්රසයේ (IBC) නියෝජ්ය මහලේකම් ආචාර්ය දමෙන්ද පෝරගේ මහතා ගෞරවනීය ආරාධිතයා ලෙස එක්විය.
උත්සවය ආරම්භ කරමින් විද්යාලයේ විදුහල්පති කේ.ඒ.ඩී. කරුණාරත්න මහතා පිළිගැනීමේ කතාව සිදු කළ අතර, එහිදී ඔහු අතිපූජ්ය දලයි ලාමා වහන්සේගේ ආදර්ශමත් චරිතය තරුණ ප්රජාවට කදිම ආදර්ශයක් බව ප්රකාශ කළේය. එමෙන්ම වසර 90කට ආසන්න ආයු වළඳමින් සිටියදීත්, මහාචාර්ය ජී.ටී. ප්රැන්සිස් ද සිල්වා මහතා තම විශාල දැනුම් සම්භාරයෙන් සමාජයට අඛණ්ඩව ඉටු කරන මෙහෙය විදුහලට මහත් ආඩම්බරයක් බවද හෙතෙම පැවසීය.
දකුණු පළාත් අතිරේක අධ්යාපන අධ්යක්ෂ සහ කීර්තිමත් ආදි සිසුවියක වන චිත්රා බමුණුසිංහ මෙනවිය අධ්යාපනික නායකත්වයේ වටිනාකම් පිළිබඳව අදහස් දැක්වීය. අනතුරුව අනුශාසනාව පවත්වමින් පූජ්ය මහාචාර්ය විලේගොඩ අරියදේව ස්වාමීන්වහන්සේ, ලෝක සාමය වෙනුවෙන් දලයි ලාමා හිමි ඉටු කළ උදාර මෙහෙවර අගය කළහ. 
1950 ගණන්වල චීන ආක්රමණය හෙළා දකිමින්, ඉන්දීය රජයට ප්රශංසා කළ ස්වාමීන්වහන්සේ, ටිබෙට් ප්රජාවට තමන්ගේම නිවසක් වැනි තවත් නිවහනක් ලබා දීම සම්බන්ධයෙන් සිය හෘදයාංගම ස්තූතිය පුද කළහ.
සභාව අමතමින් ප්රධාන ආරාධිත ශ්රී හර්වින්දර් සිං මහතා බුදුදහම සහ දලයි ලාමා හිමි කෙරෙහි ඉන්දියාවේ ඇති ගැඹුරු ගෞරවය අවධාරනය කළ අතර, සාමයේ දර්ශනයක් ලෙස ලොව පුරා බුදු දහම ප්රචාරය කිරීමට ඉන්දීය රජය නිරන්තරයෙන් කැපවී සිටින බව ප්රකාශ කළේය.
ගෞරවනීය ආරාධිත ආචාර්ය දමෙන්ද පෝරගේ මහතා නිදහස යනු අත්යවශ්ය මිනිස් අවශ්යතාවක් බව අවධාරණය කළ අතර, ඉන්දියාව, ශ්රී ලංකාව සහ ටිබෙටය බුදුරජාණන් වහන්සේගේ උතුම් දහමින් බැඳී ඇති ආකාරය පෙන්වා දුන්නේය. 
තවද, මෙම ග්රන්ථ එළිදැක්වීම ධර්මාශෝක විද්යාලයේදී පැවැත්වීම සමස්ත කලාපයටම දහම බෙදා දුන් ඉන්දියාවේ මහා අශෝක අධිරාජ්යයාගේ මතකයන් යළි අවදි කරන්නක් බවද හෙතෙම සඳහන් කළේය.
තම කෘතිය පිළිබඳව අදහස් දක්වමින් පරිවර්තක මහාචාර්ය ජී.ටී.එෆ්. ද සිල්වා මහතා ප්රකාශ කළේ දලයි ලාමා හිමිගේ ඉගැන්වීම් තම ජීවිතයට දැඩි ලෙස ආස්වාදයක් වූ බවයි. 
ලොව ප්රථම කාන්තා මුද්රණ විද්යා උපාධිධාරිනිය වන කීර්තිමත් ආදි සිසුවියක වන පර්ල් ගිනිගේ මහත්මිය විසින් ස්තූති කතාව පවත්වන ලද අතර, ඇය ලන්ඩන් නුවරදී දුරින් දුටු දලයි ලාමා හිමියන් පිළිබඳව තවමත් සංවේදීව සිහිපත් කරන බව පැවසුවාය.
